بيتر ميمي يرد على الانتقادات: لهذا السبب مسلسل «الحشاشين» بالعامية المصرية
حرص المخرج بيتر ميمي على الرد بشأن الانتقادات التي وجهت لمسلسله "الحشاشين" والتي تصدرها استخدام اللغة العامية في عمل تاريخي دارات أحداثه في القرن الحادي الميلادي؛ إضافة إلى بعض الأخطاء التاريخية في العمل.
وفي منشور عبر حسابه على فيسبوك قال بيتر ميمي: "طيب كل سنة وأنتم طيبين... مع إنى مكنتش حابب أتكلم علشان دول كلهم 4 حلقات! مبدئيا المسلسل من وحي التاريخ وده مكتوب نصا فى التترات يعنى مش وثيقة تاريخية لكنه دراما تاريخية، هو المخرج العالمي تارنتينو لما قتل هتلر فى السينما كان حقيقة؟ أو نابليون فى فيلم ريدلى سكوت الأخير هل ده نابليون اللى فى كتب التاريخ؟ ديه دراما تاريخية .. حاولنا نعمل خيال لفترة من الفترات لكن فى شكل درامي.. لكن رجعنا فى الديكور والملابس لمراجع كتيرة ونادرة علشان نعمل عالم مشوفنهوش قبل كده وميكنش شبه أفلام أو مسلسلات عالمية".
رد المخرج بيتر ميمي على انتقادات «الحشاشين»
وتابع يتر ميمي: "هل ده حسن الصباح؟ مفيش كتاب اتفق على حسن الصباح لأن المغول حرقوا القلعة وكتبه وأفكاره والموجود اجتهادـ ماركو بولو أو فلادمير بارتول أو برنارد لويس أو فرهاد دفترى… وكتير جدا، حسن الصباح كان بيعمل معجزات؟ لا طبعا.. وده تباعا مع الحلقات هيتفهم".
وردا على انتقادات استخدام اللغة العامية قال بيتر ميمي:"الحشاشين مسلسل تاريخي بالعامية المصرية، الأحداث بين أتراك وفرس لما عملوه الأتراك اتكلموا تركي ولما عملوه الأمريكان بيتكلموا إنجليزي، إحنا عاملينه فى مصر والترجمة موجودة فى كل بلد، المسلسل بيتعرض فى روسيا وأمريكا وكتر من بلد كل بلد بلغتها، هم الڤيكنجز كانوا بيتكلموا إنجليزي؟ ولا ويليام والاس كان بيتكلم اللكنة الأمريكية.
انتقادات الحشاشين
ليه حسن الصباح؟ حسن الصباح شخصية فذة وغريبة ومستفزة إنك تعرف عنها مش لازم يكون رمز للخير علشان يتعمله مسلسل.. هتلر وراسبوتين كانوا فى منتهى الشر لكنهم شخصيات فذة غيرت العالم أو على مستوانا المصرى خط الصعيد أو سفاح إسكندرية".
وأكمل بيتر ميمي ليوضح بعض الأمور عن المسلسل: "حاجات صغيرة:
- أم الخليفة رصد كانت نوبية الأصل.
- إسكندرية مدينة فى مصر .. لأن فى مدن كتير باسم إسكندرية حوالين العالم لزم التوضيح للترجمة لأن فيه غير مصريين بيتفرجوا على المسلسل.
- مجاعة القاهرة الفاطمية مثبوتة تاريخيا لكن تعددت أشكالها حسب المصادر وهي على فكرة كانت قبل وصول حسن بفترة مش بعيدة بس ديه دراما (من وحي التاريخ).
- ما تسمى بمعجزات حسن الصباح مقصود تتصور بالشكل ده وده هيبان تباعا وخصوصا مشهد الراوي حلقة 8.
- عم ملك شاه اتقتل بوتر القوس لأن ده كان عرف وتقليد.
- مين الست اللى بتظهر لحسن الصباح؟ ده فى حلقة 30 بقى لو ربنا أدانا عمر".
واختتم بيتر ميمي كلامه قائلا: "كل سنة وأنتم طيبين وسعيد أن المسلسل خلاكم تقروا وتسألوا .. وشوية شوية هتفهموا المسلسل صحصحوا معانا كده يا شباب خلونا نعمل شكل جديد وتبقى بداية ومع الوقت يتعمل أفضل وأكبر وأحسن من اللي إحنا عاملينه ومع الوقت ننافس".
مواعيد عرض مسلسل "الحشاشين"
يعرض مسلسل "الحشاشين" على منصة Watch iT الساعة 7 مساء
ويعرض على منصة Yango Play في دول الخليج، الساعة 7 مساء
كما يعرض عبر قناة DMC الساعة 9 مساء
ويعرض على قناة DMC Drama الساعة 11 مساء
يذكر أن مسلسل "الحشاشين" تأليف عبد الرحيم كمال، وإخراج بيتر ميمى، وإنتاج شركة سينرجى، وبطولة كريم عبد العزيز، فتحى عبد الوهاب، ميرنا نور الدين، أحمد عيد، إسلام جمال، نيقولا معوض، سامى الشيخ، ميمى جمال، عمر الشناوى، نور إيهاب، سوزان نجم الدين، نور محمود، أحمد كشك، ياسر علي ماهر، بالإضافة إلى عدد من الفنانين ضيوف شرف.
