عمرو مصطفى: «محمد رمضان مش استايلي ومش هلحن له تاني»
تحدث النجم عمرو مصطفى عن تعاونه مع الفنان محمد رمضان، وأنه اختاره من بين عمرو سعد، ومصطفى شعبان، وذلك للتلحين له.
وتابع خلال حواره ببرنامج «حبر سري»، تقديم الإعلامية أسما إبراهيم: «مش هلحن تاني لمحمد رمضان، ومش استايلي ومش الموسيقى بتاعتي».
وأكد أنه مستعد لتقديم صوت وردة بالذكاء الاصطناعي في مرحلة ما، مشيرًا إلى أن هناك عشرة كبيرة بينه وبين الفنانة نوال الزغبي، وقال: «معنديش نفس الكيميا دي مع نانسي عجرم، ولا يمكن أرسل الألحان لأي فنان على الواتساب».
ووجه الفنان عمرو مصطفى اتهامًا للمطرب رامي صبري، بسرقة لحن أغنيته "رقصة"، وذلك خلال استضافته في برنامج حبر سري.
وقال عمرو مصطفى: "أنا ما ينفعش أغانيا كلها بتتسرق ونزلتها من سنة ولقيته بيقول لي دا أنا عاملها من 2016 طيب أنا عايزك تطلع يا رامي أي حاجة تثبت إنك عاملها في 2016 أو 2009 زي ما قلت في تصريحات تليفيزيونية وأي آلة بتسجل عليها بتوثق التاريخ".
وتابع: "أنا بحب رامي صبري، بس ما ينفعش حد ياخد حقوقي وأبقى حلو معاه مش ممكن، أغنية رقصة نزلت وهو بارك لي عليها فيه ملحنين كتير سرقوني غير رامي صبري، وأنا ما بعرفش أسكت، فيه سرقات رهيبة عن ألحان كتير ليا".
وأضاف: "رامي صبري كلمني قال لي معلش علشان خاطري شكلي مش حلو وأنا كنت عامل الأغنية، وعاملها ومش عاملها طيب هات لي اللي يثبت إنك عاملها، أما أنا لو عايز أشيل له الأغنية من على يوتيوب هشيلها له، الأغنية ناجحة علشان أنا اللي عاملها بس أنا سيبتها له بمزاجي بس هو كان زود كنت هوقفها وبكرة الصبح هبلغ اليوتيوب إن دا لحني ونازل على يوتيوب قبله ومفيش حاجة اسمها توارد أفكار دا واخدها بالظبط، وأغنيته بعنوان يمكن خير جايبة 35 مليون مشاهدة وأنا أغنيتي رقصة جابت 4 مليون مشاهدة بس هما الاتنين لحني وجملي اللحنية، وفيه نفس الأغنية خد جملة لحنية أخرى من وائل كافوري وانا بقيت مباح، اقسم بالله ما هسيب حد ياخد جملة لحنية مني تاني".
