ابنة ممدوح عبد العليم: الناس لما بتعرف إني بنته بيعاملوني معاملة طيبة

تحدثت هنا ممدوح عبد العليم، ابنة الفنان الراحل ممدوح عبد العليم عن والدها وحب الجهور له وتعاملهم بطريقة خاصة معها بفضله.

وقالت هنا ممدوح عبد العليم خلال لقائها في برنامج "صباح العلمين" مع إبراهيم عبد الجواد: "اسم بابا ساعدني جدا أول ما الناس تعرف أنا بنت مين بلاقي مش معاملة خاصة معاملة طيبة بيبقوا عايزين يبسطوني ويطبطبوا عليا، أنا بنبسط لما بلاقي الناس بتحبه، أنا بتكسف ومش بقول لحد إني بنته لكن دايما بيبقى حد قايلهم والناس بتكون لطيفة معايا".

وتابعت هنا ممدوح عبد العليم: "حب الناس ليه غير عادي، على الأقل مرة في الشهر حد بيوقفني يكون عارفني أو شافني في مكان ويدعوله، أنا مشفتش حد الناس لسه بتفتكره وبتحبه بعد 8 سنين من وفاته ودا بيبسطني لأن هما مش راضيين ينسوه ودي أكتر حاجة بسعى ليها أن محدش ينساه".

وأضافت هنا ممدوح عبد العليم: "هو غير أنه فنان من وجهة نظري مجاش زيه، هو أب مجاش زيه، يعني هو كان بينيمني ويوديني المدرسة ولو ماما مش عايزة أعمل حاجة أروح له وأعملها، ويوم ما قررت أسافر للدراسة برا مصر كان واقف معايا وكان بيشجعني إني أسعى ورا أحلامي، أي حاجة وصلتلها بسببه وبسبب ماما".

وهنا هي الابنة الوحيدة للإعلامية شافكي لمنيري من زوجها الفنان الراحل ممدوح عبد العليم، الذي رحل عن عالمنا عام 2016 إثر إصابته بأزمة قلبية مفاجئة عن عمر يناهز 60 عاما.